Ipinaliwanag ng kilalang comedy queen na si Ai-Ai delas Alas kung bakit niya piniling pumanig at ipagtanggol si Angelica Yulo sa kabila ng kontrobersiyang kinasasangkutan nito sa kanyang anak na si Carlos Yulo, ang two-time Olympic gold medalist. Sa isang panayam, inamin ni Ai-Ai na hindi niya alam ang lahat ng detalye sa naging alitan sa pagitan nina Carlos at Angelica, ngunit para sa kanya, nananatiling katotohanan na si Angelica ay isang ina, at iyon ang kanyang pinapahalagahan.
Ayon kay Ai-Ai, hindi matatawaran ang pagiging ina ni Angelica, kaya't nanindigan siyang suportahan ito. “Pinaglalaban ko talaga na Team Nanay ako… Kung anuman ‘yong kaguluhan nila, ang nanay ay nanay,” ani ni Ai-Ai. Naniniwala siyang kahit ano pa ang pinagdadaanan ng mag-ina, hindi mababago ang katotohanan na ang pagiging ina ay isang mahalagang papel na hindi mapapalitan ng kahit anong materyal na bagay.
Dagdag pa ni Ai-Ai, "Actually, kung usaping pera ‘yan, sabi nga, pera lang ‘yan, eh. Pero ‘yong iluwal ka ng nanay mo, mahirap manganak, ha. ‘Yong iluwal ka sa mundo, hindi mo naman mababayaran ‘yon. Never mong mababayaran." Para sa kanya, mas malalim at mahalaga ang pagiging magulang kumpara sa anumang isyu ng pera.
Sinabi rin ni Ai-Ai na humingi na ng paumanhin si Angelica sa kanyang anak na si Carlos, kaya't para sa kanya, wala na siyang nakikitang dahilan para patuloy na magkaroon ng tampuhan ang mag-ina. Naniniwala siya na ang pagpapatawad ay isa sa mga pinakamahalagang hakbang para maibalik ang pagkakaisa sa pamilya.
Nagbahagi rin si Ai-Ai ng kanyang personal na karanasan tungkol sa tampuhan sa kanyang biological mother. Ayon sa kanya, naranasan niyang magtampo sa kanyang ina dahil sa pinaampon siya nito noong bata pa siya. Ngunit noong nagkita sila at humingi ng paumanhin ang kanyang ina, agad niya itong napatawad.
“Kasi di ba, adopted ako? So, nung nag-sorry siya sa akin, para akong binuhusan nang ano… sabi ko, ‘Di mo kailangang mag-sorry sa akin. Sapat na ‘yong ipinanganak mo ko, na nabuhay ako sa mundong ito ng dahil sa’yo," wika ni Ai-Ai.
Para kay Ai-Ai delas Alas, walang anuman ang makakapantay sa sakripisyo ng isang ina. Kaya't nananatili siyang "Team Nanay" at ipinapakita ang kanyang suporta kay Angelica Yulo, umaasang muling magkakabati ang mag-ina at maibabalik ang kanilang masayang samahan.
Walang komento:
Mag-post ng isang Komento