Ibinahagi ng Comedy Queen na si Ai-Ai Delas Alas ang kanyang suporta at payo para kay Angelica Yulo, ina ng sikat na gymnast na si Carlos Yulo, kaugnay ng posibilidad na sumali si Angelica sa Mrs. Philippines pageant sa susunod na taon.
Matatandaang ipinahayag ng President ng Mrs. Philippines Organization, Erika Joy Santos, ang interes nilang anyayahan si Angelica na sumali sa kompetisyon. “She’s very much welcome to join Mrs. Philippines 2025. Why not?” ani Erika, at nagpaabot din ng intensyon na makipag-usap kay Angelica.
Naniniwala si Ai-Ai na kakayanin ni Angelica ang Question and Answer portion ng pageant, na isa sa mga mahahalagang bahagi ng kompetisyon. “Sa question and answer, mukhang panalo ka,” ani Ai-Ai, na naniniwalang taglay ni Angelica ang talino at tapang na kailangan para magtagumpay.
Gayunpaman, bilang dagdag na payo, iminungkahi ni Ai-Ai na maghanda si Angelica sa pisikal na aspeto ng kompetisyon. “Magpaseksi ka muna bago tayo sumali doon,” biro ng Comedy Queen, ngunit may seryosong intensyon na makita si Angelica na handa at kumpiyansa sa kanyang sarili sa entablado. “Kailangan magpa-bump muna tayo, mader, para winner ka! Hindi, dapat uuwi kang winner!”
Sa kasalukuyan, hindi pa nagbibigay ng sagot si Angelica kung sasali siya sa Mrs. Philippines 2025. Kung sakaling manalo siya, makakatanggap si Angelica ng P150,000 at posibleng mga brand endorsement offers.
Pinuri rin ni Ai-Ai ang pagiging mapagmahal at masigasig na ina ni Angelica. Ayon sa kanya, malaki ang sakripisyong ginawa ni Angelica para maitaguyod ang tagumpay ng kanyang mga anak, lalo na sa larangan ng gymnastics. “I believe in the goodness and kindness of motherhood,” dagdag pa ni Ai-Ai, na nagbibigay-pugay sa dedikasyon ni Angelica bilang isang ina.
Habang inaabangan ng marami ang magiging desisyon ni Angelica, tiyak na magiging malaking inspirasyon ang kanyang pagsali sa Mrs. Philippines para sa mga nanay na nagnanais patuloy na mangarap at magtagumpay, kahit nasa yugto na sila ng pagiging ina.
Walang komento:
Mag-post ng isang Komento