Nagiging usap-usapan sa social media ang tila pagiging fashion show ng Kamara de Representantes matapos mapansin ng ilang netizens ang pagbibida ng ilang mga mambabatas sa kanilang mamahaling gamit na nagkakahalaga ng milyon-milyong piso. Isa sa mga napansin ng publiko ay si Ching Bernos, isang kongresista mula sa Abra, na nag-trending dahil sa kanyang mga bag at relos na umaabot sa milyon ang halaga.
Ayon sa mga netizen, ang mga bag ni Bernos ay tinatayang nagkakahalaga mula P19 milyon hanggang P23 milyon, habang ang kanyang mga relos ay nasa P1 milyon hanggang P17.4 milyon. Sa kabuuan, ayon sa mga larawang nakalap ng netizens, ang mga gamit na ipinapakita ni Bernos ay umaabot sa P156 milyon.
Dahil dito, marami ang nagtanong kung naaayon ba ito sa Code of Conduct and Ethical Standards for Public Officials and Employees, na nagbabawal sa mga opisyal ng gobyerno na magpakita ng marangyang pamumuhay, lalo na't sila ay nasa posisyon ng paglilingkod sa bayan.
Sa harap ng kontrobersyang ito, ipinahayag ng ilang netizens ang kanilang pagkadismaya sa tila pagpapakitang yaman ng ilang mambabatas habang marami pa ring Pilipino ang patuloy na naghihirap. Ayon sa kanila, hindi ito naaayon sa responsibilidad ng mga public servants na dapat ay mas nakatuon sa pagtulong sa kanilang mga nasasakupan kaysa sa pagpapakita ng mga mamahaling kagamitan.
Bagama’t wala pang opisyal na pahayag mula sa kampo ni Bernos, patuloy pa ring umuugong ang diskusyon tungkol sa pagiging simple ng mga lingkod-bayan at kung paano nila dapat isabuhay ang pagiging huwaran sa lipunan, lalo na sa harap ng kanilang mga nasasakupan.
Walang komento:
Mag-post ng isang Komento