Nagulantang ang komunidad ng mga guro at mag-aaral sa Davao de Oro matapos ang malungkot na balitang pagpanaw ng isang beteranong guro na si Marjorie Llanto Boldo, na nagsilbi ng 31 taon sa Tibagon Elementary School. Ayon sa mga ulat, pumanaw si Boldo dahil sa matinding stress at heart problems matapos umanong maranasan ang pangmamaliit at panenermon ng kanilang school principal na si Alvin Escobar.
Nag-ugat ang insidente matapos ipatawag ni Principal Alvin Escobar si Boldo sa kanyang opisina upang pag-usapan ang isang pangyayari sa klase ng guro, kung saan umano'y nasaktan ang isang estudyante. Ayon sa mga ulat, kinailangan ding humarap ni Boldo sa ina ng naturang estudyante, na lalong nagdulot ng stress sa guro.
Ibinahagi ni Boldo sa kanyang class group chat ang pagkadismaya at hinanakit sa pangyayari, at ipinagtanggol niya ang kanyang sarili laban sa mga paratang na pinabayaan niya ang insidente sa kanyang klase. Ayon kay Boldo, masyadong binigyang-diin ni Principal Escobar ang kanyang pagkukulang at sinabing hindi sapat ang 31 taon ng serbisyo niya sa paaralan dahil hindi siya agad nakapagbigay ng tamang aksyon upang tulungan ang nasabing estudyante.
Matapos ang insidente, nagkasakit si Boldo at dinala sa ospital noong Setyembre 17. Dalawang araw matapos ang pagkaka-confine, pumanaw si Boldo dahil sa heart complications. Ayon sa kanyang ina na si Gloria Llanto, may hemophobia o takot sa dugo si Boldo, kaya't hindi niya nagawang agad-agad na tumugon sa insidente na naganap sa kanyang klase. Ito rin ang isa sa mga dahilan kung bakit labis na dinamdam ng guro ang mga salitang binitiwan ni Principal Escobar sa kanya.
Sa gitna ng kontrobersiya, nangako ang Department of Education (DepEd) na magsasagawa ng isang masusing imbestigasyon upang alamin ang tunay na nangyari at kung mayroon bang pagkukulang o pananagutan sa panig ng principal. Ayon sa DepEd, hindi nila kukunsintihin ang anumang uri ng pang-aabuso o hindi makatarungang pagtrato sa kanilang mga guro, at nais nilang bigyan ng hustisya si Boldo at ang kanyang pamilya.
Ang pagkamatay ni Marjorie Llanto Boldo ay nagdala ng malalim na tanong sa mga netizens tungkol sa kalagayan at proteksyon ng mga guro sa ating sistema ng edukasyon. Maraming netizens ang naglabas ng kanilang saloobin sa social media, na nagbigay-diin sa kahalagahan ng respeto at wastong pagtrato sa mga guro na naglalaan ng kanilang buhay upang magbigay kaalaman sa mga kabataan.
Walang komento:
Mag-post ng isang Komento