Isang nakakaaliw na eksena ang naganap kamakailan sa programang Tiktoclock ng Kapuso network nang makasama ng komedyanteng si Herlene Budol ang OPM legend na si Jose Mari Chan. Sa video na shinare ni Herlene sa kanyang Instagram, kitang-kita ang kilig at kasiyahan matapos siyang mabigyan ng P1,000 na pamasko mula sa iconic singer.
Habang kinakanta ni Jose Mari Chan ang sikat na awitin na "Christmas In Our Hearts," biglang nag-adlib ng “stupid” si Herlene na hango sa isang Pinoy rap song. Agad na naguluhan si Jose Mari at tinanong si Herlene, “Ano ‘yun Chinese?” Dali-daling sumagot si Herlene ng, “Hindi po, background lang po,” sabay sabing nangangaroling siya sa tanyag na singer.
Sa di inaasahang pagkakataon, dinukot ni Jose Mari ang kanyang pitaka at iniabot ang P1,000 kay Herlene bilang pamasko. Sa sobrang tuwa, nagtatalon pa si Herlene at sinabi, “First time ko sa tanang buhay ko na napamaskuhan ako ng isang libong piso!”
Hindi naiwasan ni Herlene ang magbiro at tawagin si Jose Mari Chan na "Ninong," na ikinatuwa ng mga netizens. Ipinakita nito na kahit ang mga sikat na personalidad ay nadadala rin ng Pasko at nakakaranas ng simple ngunit masayang mga sandali. Patunay lamang na ang diwa ng Pasko ay buhay na buhay, at kahit sino pa man tayo, bawat isa sa atin ay pwedeng makaramdam ng kasiyahan at biyaya sa panahon ng Kapaskuhan.
Walang komento:
Mag-post ng isang Komento