Sa isang eksklusibong panayam, isinapubliko ni Carlos Yulo, two-time Olympic gold medalist, ang kanilang plano ng kasal ng kanyang kasintahang si Chloe San Jose sa taong 2025. Ayon kay Carlos, pinaplano na nilang lumagay sa tahimik matapos ang ilang taon ng pagiging magkasintahan. Bagama’t nakatuon pa rin si Carlos sa kanyang karera bilang isang world-class gymnast, hindi nito itinatago ang kanyang pananabik sa susunod na yugto ng kanyang buhay kasama si Chloe.
Sa parehong panayam, ibinahagi rin ni Carlos ang kanilang plano na magkaroon ng mga anak pagkatapos ng kanyang pagsabak sa LA 2028 Olympics. “Maybe next year and have children maybe after I compete in LA. We want to get married next year,” ani Carlos, na nagpahiwatig ng kanilang mga plano para sa hinaharap matapos ang mga international competitions.
Sa kabila ng magandang balita ng nalalapit nilang pagpapakasal, hindi maiwasang tanungin ng mga netizens kung ano ang magiging reaksyon ng ina ni Carlos, si Angelica Yulo. Alam ng publiko na matagal nang may tensyon sa pagitan nina Angelica at Chloe, at ito’y nagdulot ng espekulasyon kung may suporta ba mula sa pamilya ni Carlos ang kanilang planong pagpapakasal.
Hindi lingid sa kaalaman ng karamihan na nagkaroon ng hindi pagkakaintindihan sina Angelica at Chloe. Dahil dito, marami ang nagtataka kung paano tatanggapin ni Angelica ang desisyon ng kanyang anak na pakasalan si Chloe. Sa kabila ng mga isyung ito, nananatiling tahimik si Angelica tungkol sa mga plano ng kasal ng kanyang anak, at walang opisyal na pahayag mula sa kanya.
Sa kabila ng mga kontrobersiya, maraming netizens ang nagpahayag ng suporta kina Carlos at Chloe. Marami ang nagsasabing mahalaga ang personal na kaligayahan ng bawat isa, at umaasa silang malalampasan ng magkasintahan ang anumang mga isyu sa pamilya. Gayunpaman, hindi rin maiwasang may mga nagkomento na ang suporta ng pamilya ay mahalaga sa tagumpay ng isang relasyon, lalo na kung ito'y papasok na sa mas seryosong yugto tulad ng kasal.
Walang komento:
Mag-post ng isang Komento