Sa gitna ng mga espekulasyon at akusasyon mula sa ilang netizens, diretsong itinanggi ng aktres na si Carmina Villarroel ang mga paratang na siya ang dahilan kung bakit hindi natutuloy ang mga relasyon ng kanyang kambal na anak na sina Mavy at Cassy Legaspi. Lumabas ang mga usap-usapan na si Carmina umano ang humahadlang sa umuusbong na romansa ni Cassy sa singer at TV host na si Darren Espanto, at siya rin daw ang dahilan ng paghihiwalay nina Mavy at ng aktres na si Kyline Alcantara.
Sa isang panayam, kalmadong ipinahayag ni Carmina ang kanyang saloobin hinggil sa mga akusasyon. Aniya, "Alam ko na kahit ano pa ang sabihin ko, sarado na ang isip ng mga bashers." Ngunit binigyang-diin niya na ang mga taong tunay na nakakakilala sa kanya at sa kanyang pamilya ay alam ang katotohanan. "Hindi ko kailangan magpaliwanag sa mga taong hindi naman bukas ang isip para unawain ako," dagdag pa niya.
Iginiit ni Carmina na ang kanyang mga aksyon ay bunga lamang ng kanyang pagmamahal at proteksyon sa kanyang mga anak. "I'm just being a mother," sabi niya. Bilang isang ina, natural lamang na nais niyang mapabuti ang kalagayan nina Mavy at Cassy, ngunit hindi ibig sabihin nito na nakikialam siya sa kanilang personal na buhay. "Hinahayaan ko silang magdesisyon para sa sarili nila. Nandito lang ako para gabayan sila kung kailangan nila ng aking payo," paliwanag ni Carmina.
Sa kabila ng mga kontrobersya, ipinahayag ng aktres na maayos at matibay ang relasyon niya sa kanyang kambal. Regular silang nag-uusap at bukas ang komunikasyon sa pagitan nila. "Open kami sa isa't isa. Alam nila na anytime, pwede nila akong lapitan," aniya. Sinisiguro rin ni Carmina na nirerespeto niya ang privacy at mga desisyon ng kanyang mga anak.
Walang komento:
Mag-post ng isang Komento