Naiyak na lamang ang guro na si Mary Hazel Austria, isang Teacher 1 sa El Nido National High School, habang ikinukwento niya ang kanyang mapait na karanasan sa kanilang school principal. Dahil sa hindi na niya makayanan ang patuloy na panggigipit at hindi makataong trato sa kanya, nagdesisyon siyang lumapit sa himpilan ng radyo ng Brigada upang ibahagi ang kanyang pinagdaanan.
Ayon kay Mary Hazel Austria, hindi lang siya ang pinag-iinitan ng kanilang principal kundi pati na rin ang kanyang anak na nag-aaral din sa nasabing paaralan. Dumating na sa puntong hindi na niya matiis ang pang-aapi sa kanya, kaya't nagpasya siyang magsalita at isiwalat ang kanyang sitwasyon sa publiko.
Sa kanyang panayam, ipinahayag ni Austria ang takot na nararamdaman niya sa tuwing nakikita at nakakasalamuha ang kanilang principal. “Sa palagay ko walang maglalakas ng loob na magsumbong, takot lahat sa kanya (principal). Ako rin takot sa kanya pero sa dami ng sama ng loob na binigay niya sa akin, ‘di na ako matatakot magsabi kahit kanino,” pahayag ng guro.
Inamin din ni Austria na matagal niyang itinago ang kanyang nararamdaman, hindi lamang sa kanyang mga kasamahan sa trabaho kundi maging sa kanyang asawa. “Tulad dati, ‘di ko sinasabi sa asawa ko, ngayon ko lang nai-kwento sa kanya,” dagdag pa ng guro habang napapaluha sa kanyang pagkukwento.
Sa kasalukuyan, wala pang pahayag ang nasabing principal hinggil sa mga alegasyon ni Mary Hazel Austria. Umaasa si Austria na ang kanyang kwento ay magbubukas ng mata sa sitwasyon ng mga guro na maaaring nakakaranas din ng katulad na pang-aapi ngunit natatakot magsalita dahil sa takot sa kanilang mga superyor.
Walang komento:
Mag-post ng isang Komento