Nagbahagi ng mahalagang paalala ang aktres na si Jodi Sta. Maria sa publiko kaugnay ng nalalapit na eleksyon sa 2025. Ayon kay Jodi, bagaman walang kontrol ang mga tao sa kung sino ang mga tatakbo para sa iba't ibang posisyon sa gobyerno, malaki pa rin ang kapangyarihan ng bawat mamamayan sa pamamagitan ng kanilang pagboto. Binigyang-diin niya ang kahalagahan ng paggawa ng "matalinong desisyon" sa pagpili ng mga kandidatong karapat-dapat sa tiwala ng publiko.
"We may not have control over who runs for public office, but our strength lies in wisely choosing those deserving of our trust. Make informed choices," ani Jodi sa isang panayam.
Ang pahayag ni Jodi ay kasunod ng mga reaksiyon at reklamo ng ilang netizens patungkol sa pagtakbo ng ilang mga social media influencers at content creators sa iba't ibang posisyon sa gobyerno. Maraming netizens ang nagpahayag ng kanilang pangamba at pag-aalinlangan sa kakayahan ng mga ito na pamahalaan ang bayan, lalo na kung wala umano silang sapat na karanasan sa pamahalaan o serbisyo publiko.
Sa kabila ng mga isyung ito, naniniwala si Jodi na nasa kamay pa rin ng mga botante ang desisyon sa kung sino ang iluluklok sa puwesto. Hinikayat niya ang mga tao na pag-aralan at kilalanin mabuti ang mga kandidato upang makabuo ng tamang pasya.
"Sa dami ng mga kandidatong tatakbo, huwag basta-basta magdesisyon. Kailangan kilalanin natin ang kanilang plataporma at ang kanilang kakayahang magsilbi sa bayan," dagdag ni Jodi.
Si Jodi Sta. Maria, bukod sa pagiging aktres, ay kilala rin sa kanyang mga aktibong pahayag ukol sa mga isyung panlipunan. Sa kanyang mga mensahe, palagi niyang hinihikayat ang kanyang mga tagahanga na maging responsableng mamamayan at laging isaisip ang kapakanan ng bayan sa tuwing darating ang panahon ng eleksyon.
Walang komento:
Mag-post ng isang Komento