Nagpahayag ng kanyang pagkabahala ang social media personality at negosyanteng si Rendon Labador kaugnay sa pagpasok ni Diwata sa mundo ng politika. Si Diwata, na sumikat bilang isang viral food vendor, ay naghain ng kanyang Certificate of Nomination and Acceptance (CONA) nitong Miyerkules bilang ikaapat na nominee ng Vendor’s Party-list. Ang partidong ito ay nakatutok sa pagtataguyod ng interes ng mga vendor at maliliit na negosyante.
Sa isang Facebook post, ibinahagi ni Rendon ang kanyang mga agam-agam tungkol sa kakayahan ni Diwata na harapin ang hamon ng politika. Aniya, "Baka akala ni Diwata magluluto at magtitinda lang siya ng pares. Paki tanong nga kung alam niya 'yang pinapasok niya. Nag-aalala ako para sa kanya."
Hindi direktang minamaliit ni Rendon ang kakayahan ni Diwata, ngunit ipinahayag niya ang kanyang pag-aalala sa pagiging handa nito sa masalimuot na mundo ng pulitika. Ayon kay Rendon, mahalagang siguruhin ng mga influencer at content creators, tulad ni Diwata, na handa silang harapin ang mga responsibilidad ng pamahalaan, dahil sa halip na makatulong, baka maging abala pa sila sa proseso.
Hindi lamang si Diwata ang tila pinatamaan ni Rendon sa kanyang pahayag. Ibinigay din niya ang kanyang paalala sa iba pang mga kilalang personalidad, lalo na ang mga influencer at content creators na nagpaplanong tumakbo sa 2025 midterm elections.
“Siguraduhin sana ng mga influ/celeb o mga content creators ang pinapasok nila. Kasi baka imbes na makatulong, maging abala pa kayo, huwag naman sana," ani Rendon.
Binibigyang-diin ni Rendon na hindi basta-basta ang pagsabak sa politika. Marami ang nangangailangan ng masusing pag-aaral, malalim na pag-unawa sa mga isyu ng bansa, at handang magsakripisyo para sa kapakanan ng mas nakararami. Ang mga responsibilidad ng isang lingkod bayan ay higit pa sa kasikatan at impluwensya na dala ng pagiging isang online personality.
Walang komento:
Mag-post ng isang Komento