Tila nakahinga na nang maluwag ang baguhang aktor na si Sandro Muhlach matapos ang desisyon ng Department of Justice (DOJ) na ituloy ang mga kasong inihain niya laban sa GMA independent contractors na sina Jojo Nones at Richard “Dode” Cruz. Ayon sa DOJ, nakitaan ng sapat na ebidensya ang mga reklamo ni Muhlach ukol sa umano'y pang-aabuso at pagsasamantala sa kanya, dahilan upang pormal na umusad ang kasong rape at acts of lasciviousness laban kina Nones at Cruz.
Si Muhlach, na kamakailan lamang ay nagpahayag ng kanyang saloobin tungkol sa hirap na kanyang pinagdaanan, ay nagbigay ng mensahe sa iba pang biktima ng pang-aabuso. Sa kanyang pahayag, hinikayat niya ang mga biktima na huwag magpaapekto sa mga nagpapatahimik sa kanila at huwag hayaang manalo ang mga gumawa ng kasamaan sa kanila. Ani ni Sandro, “‘Wag nating hayaang manalo ang mga nagsamantala at bumaboy sa atin. ‘Wag nating hayaan na patahimikin nila tayo. Tayo ang biktima. Tayo ang inabuso. Tayo rin ang papanigan ng katotohanan.”
Sa kanyang matapang na mga salita, ipinakita ni Muhlach ang kanyang dedikasyon sa paghahanap ng hustisya hindi lamang para sa kanyang sarili kundi para na rin sa ibang biktima ng pang-aabuso. Naging inspirasyon ang kanyang paninindigan sa maraming netizens, na nagsasabing ang ganitong mga hakbang ay nagpapalakas ng loob ng iba pang biktima na humingi rin ng hustisya.
Walang komento:
Mag-post ng isang Komento