Ibinunyag ng beteranang showbiz personality na si Cristy Fermin na natalo siya sa limang kaso ng libel na isinampa laban sa kanya ng mag-asawang Sharon Cuneta at dating senador Francis "Kiko" Pangilinan. Sa kanyang programang "Cristy Ferminute," ikinuwento ni Cristy ang mga pangyayari at kung paano niya tinanggap ang pagkatalo. Natanggap niya ang balita nitong Oktubre 17, kung saan kinailangan niyang magbayad ng piyansa para sa bawat kaso.
"Talo po ako sa five counts ng libel, at ang sabi nga natin, inflation is real," ani Cristy. "Hindi lamang po mga bilihin ang tumataas ngayon. Ilang taon na po ang nakakaraan, nag-bail lang po ako ng P10,000 para sa isang kaso ng libel.
Ayon kay Cristy, may malaking pagbabago sa halaga ng piyansa, na umabot na ngayon sa P48,000 bawat count, mula sa dating P10,000 lamang ilang taon na ang nakalipas. Bagama't nalungkot siya sa naging desisyon, matapang niyang tinanggap ang hatol at nagbigay ng pasasalamat sa mga tagasuporta na patuloy na nagpapakita ng pakikiramay sa kanya.
Nilinaw din ni Cristy na ito pa lamang ang unang hakbang ng kaso at inaasahan niyang aakyat pa ito sa Regional Trial Court ng Makati. Ipinahayag niya na patuloy siyang lalaban sa kaso at umaasa sa makatarungang desisyon mula sa mga mas mataas na korte, kabilang ang Court of Appeals at, kung kinakailangan, ang Supreme Court.
Walang komento:
Mag-post ng isang Komento